All About Leon

【容祖兒演唱會】黎明現身Joey跪地 《傻痴痴》背後有段尷尬事?
In Response To: 2019-08-25 新聞 *NM* ()

【容祖兒演唱會】黎明現身Joey跪地 《傻痴痴》背後有段尷尬事?

影片網址 https://www.hk01.com/%E7%9C%BE%E6%A8%82%E8%BF%B7/367647/%E5%AE%B9%E7%A5%96%E5%85%92%E6%BC%94%E5%94%B1%E6%9C%83-%E9%BB%8E%E6%98%8E%E7%8F%BE%E8%BA%ABjoey%E8%B7%AA%E5%9C%B0-%E5%82%BB%E7%97%B4%E7%97%B4-%E8%83%8C%E5%BE%8C%E6%9C%89%E6%AE%B5%E5%B0%B7%E5%B0%AC%E4%BA%8B

文:彭嘉彬
2019-08-25 00:12
最後更新日期:2019-08-25 00:19

容祖兒《Pretty Crazy》紅館演唱會今晚舉行尾場,雖然Joey連日來只得一天假期,但去到壓軸一場當然去到盡,毫不留力展示天后風範。以《空港》打頭陣,然後到medley《Show Up!》、《好事多為》、《逃》、《美麗在望》加《隆重登場》,炒熱全場氣氛。台上台下都去到盡,Joey形容觀眾的尖叫聲如雷貫耳,嗌到拆天。她又話要充當大家的奶媽,為大家充電。

攝影:葉志明

Joey換上一襲桃紅色長裙唱出《再見我的初戀》,高呼:「你哋嘅少女時代返嚟喇!」唱到一半全場尖叫,就連Joey都話:「你哋知唔知咩係如雷貫耳呀?嗌到拆天咁呀!小心聽日失聲呀!我就話唔驚啫!畀我唱埋先。你哋嗌到我三魂唔見七魄!」接著唱出《天之嬌女》。Joey又講到:「今晚你哋將紅館以外嘅情緒擺低先,如果你哋係iPhone,我就係你哋奶媽幫你叉爆電!」

Joey打完招呼後唱出《逃避你》,本應要返回後台換戰衣,豈料她突然說:「今晚賣大包呀!行出嚟唱多首好唔好呀?」全場叫好和應,Joey再說:「你哋話唔好我都唔制啦!」作為尾場演出,今晚本來訂好的歌單也臨時改變了不少,祖兒心情好,入場樂迷當然有福。

黎明出場前,Joey向觀眾說:「今晚我幫大家搵咗好多青春係咪呀?以下呢段時間係我嘅!大家唔好同我爭呀!我喺核心嘅外圍等佢喺核心嘅內圍出現!」雖然事前已流出了嘉賓名單,但亦無損大家的熱情,全場瘋狂尖叫歡迎另一位天王——黎明出場。Leon是第三位上台支持Joey的天王,令天后到再次變回迷妹,興奮得手舞足蹈,就連Leon都問:「你做咩係咁跳呀?」Joey說:「我控制唔到呀!」Leon神回:「咁你繼續吖,個台好實淨!」兩人合唱《夏日傾情》表情相當大反差,Leon很冷靜,Joey則超激動。

Leon出名金句王,到Chit Chat環節,他說:「依家係10點52分,有兩個錯誤。第一,通常10點半我就走咗,第二,10點半通常已經陪緊個女瞓。」話雖如此,Joey難掩激動心情大叫:「Leon!Leon!我可唔可以攬下你拖住你呀?」豈料Leon說:「傾偈嗰陣可唔可以唔拖呀?我要空番隻手拖個女。」

Joey解釋邀請黎明的原因,事源年初一次在餐廳內偶遇,當時Leon答:「8月開呀,我記住佢!」Joey形容對方一口答應,豈料Leon說:「當時我冇應承或者拒絕,哈哈!」Joey變成開籠雀,又說:「當時見到你真係好興奮,無啦啦見到黎明。」旁邊的Leon即爆金句:「因為夜晚見到黎明係咪?」台下觀眾即爆笑。

祖兒再問,Leon成日賜人金句,可有金句贈自己?黎明說:「你頭髮好金,總之就Good Luck。」Joey又講到十分喜歡《原振俠》,Leon提到當年Plug歌一段往事:「當時喺電台宣傳,咁啱有一班智障人士,希望我清唱首歌為鼓勵佢哋,但我話呢首新歌唔唱得㗎⋯⋯」有口難言的Leon,隔了一會說:「因為呢首歌叫《傻痴痴》。」然後兩人再合唱《傻痴痴》。


第三位天王黎明現身支持Joey,兩人合唱《夏日傾情》,祖兒顯得相當激動。 (葉志明攝)


黎明作為尾場嘉賓,深信觀眾都冇投訴啦! (葉志明攝)


Joey忍唔住要攬攬。 (葉志明攝)


企喺黎明隔離,天后頓成小粉絲。 (葉志明攝)


合唱《夏日傾情》 (葉志明攝)


乘機又貼下背,爭取下福利。 (葉志明攝)


雖然之前已經有嘉賓名單流出,不過樂迷見到黎明依然尖叫不停。 (葉志明攝)


好想聽金句王表演。 (葉志明攝)


Joey問Leon可唔可以攬下,豈料Leon說:「傾偈嗰陣可唔可以唔拖呀?我要空番隻手拖個女。」 (葉志明攝)


你數唔數到Leon講咗幾多金句? (葉志明攝)

---------------------------------------

https://topick.hket.com/article/2435199

【容祖兒演唱會】黎明犧牲湊女時間任終極嘉賓 Leon為祖兒大送金句

00:25 2019/08/25

容祖兒《Pretty Crazy》演唱會今晚(8月24日)舉行第19場尾場演出,Joey依然落力使盡渾身解數,更為表演自彈自唱用了一年時間準備。而尾場終極嘉賓,是邀來天王黎明演出,全場粉絲都陷入瘋狂,也是祖兒今次個唱繼張學友、劉德華之後,再邀來另一天王級嘉賓。

其實之前已有傳尾場會邀來黎明做嘉賓,結果真如觀眾所料,Leon出場前,祖兒已極興奮,表示這位嘉賓代表她的青春,更踎下說:「我暈啦。」

之後她唱出《夏日傾情》請黎明出場,Joey也興奮跟著「Leon Leon」,黎明台上笑道:「現在是10:52分,我平時演唱會10:30便完,現在應該陪女睡覺。」Joey笑稱:「不好意思,阻你湊女。」

祖兒解釋為何請黎明,原來年初她餐廳碰到黎明順道邀約,誰知他一口答應,心裡實在興奮又感激。

黎明即爆金句:「因為夜晚見到黎明係咪?」祖兒問Leon有否金句送贈,Leon即答:「你頭髮好金,Good Luck。」之後二人合唱《傻痴痴》。

尾場祖兒狀態大勇,Joey又自彈自唱《啜泣》,中間一道忘詞,「哎呀」了一聲,令全場大笑。


▲ 祖兒看到偶像已大叫暈到。(攝影:梁樂欣)


▲ 黎明大送金句。(攝影:梁樂欣)


▲ 二人合唱《傻痴痴》。(攝影:梁樂欣)

Messages In This Thread

2019-08-25 新聞 *NM*
【容祖兒演唱會】慈父黎明拒絕拖手 「我隻手要拖我個女」
視頻﹕Pretty Crazy 容祖兒演唱會 第19場尾場嘉賓黎明
視頻﹕【容祖兒演唱會】黎明現身Joey跪地 《傻痴痴》背後有段尷尬事?
【容祖兒演唱會】黎明現身Joey跪地 《傻痴痴》背後有段尷尬事?