All About Leon

【歷代阿May】廣告定電影? 黎明「Just to say hi」最經典

https://hk.entertainment.appledaily.com/enews/realtime/article/20180130/57768954

【歷代阿May】廣告定電影? 黎明「Just to say hi」最經典

建立時間 (HKT): 0130 00:00

曾經香港嘅娛樂圈五光十色,大家除咗會買碟聽歌追星睇劇之外,就連廣告都令人著迷,好似九十年代四大天王之一嘅黎明,大家諗起嘅一定係佢同電迅商合作嘅一系列「阿May」廣告,當年因為咁身邊都唔知多咗幾多個女仔叫阿May。

本來阿May只係一個好簡單嘅商業廣告,但係意外地當時大受歡迎,所以就出現咗往後嘅一系列作品,而講到阿May,就不得不提今年45歲嘅童愛玲,廿四年前同黎明拍嘅廣告係系列當中第一套落重本嘅作品,兩分鐘嘅廣告片拍到成套電影咁,難怪當年令到童愛玲彈出啦。

除此之外,其實歷年嚟做過「阿May」嘅模特兒,發展都幾好,最紅嗰個,仲係天后級!講緊嘅係韓國女神全智賢,佢都係「阿May」之一,當年個故仔講黎明去天山散心,點知遇上全智賢,嗰個廣告嘅經典對白係「Just to say hi」,講「chok」,其實黎明一早已經做到。

另一個「阿May」,就係月前誕下一對孖B嘅楊采妮(Charlie),喺1997年播出嘅廣告,當時Charlie同馮德倫飾演一對姊弟,因為馮德倫反叛出走,黎明為咗去救返對方,上演一幕「要贏人,先要贏自己」嘅笨豬跳,嚇窒馮德倫,最後?當然係奪得美人歸。

而最後一代嘅「阿May」大家仲記唔記得呢?就係喺04年由徐子珊擔任喇,當時子珊已經係港姐冠軍,佢喺廣告當中同黎明出海捕魚,點知黎明爹哋病危,子珊為咗幫黎明可以快啲返出巿區探爹哋,陪跑到碼頭再送黎明出海,有別於一貫嘅男女愛情線,呢條父子親情線都新鮮,不過可惜隨住資訊爆炸嘅新紀元到嚟,大家嘅娛樂唔再只得坐定定睇人播嘅電視,到咗今時今日,更加有好多手法向廣告說不,呢類型嘅廣告就真係難免買少見少。


黎明同全智賢合演過電訊商廣告(資料圖片)


全智賢(資料圖片)


楊采妮都做過「阿May」(互聯網圖片)


左邊嘅馮德倫係做Charlie細佬。(資料圖片)


呢個廣告去到日本拍,當時黎明同徐子珊更傳緋聞。(資料圖片)


(互聯網圖片)