All About Leon

【打住呵欠唱】陳奕迅扮黎明唱腔 fans嬲嬲:Leon啲歌好難唱到嗰種神韻

http://hk.apple.nextmedia.com/enews/realtime/20171010/57313765

【打住呵欠唱】陳奕迅扮黎明唱腔 fans嬲嬲:Leon啲歌好難唱到嗰種神韻

建立時間 (HKT): 1010 15:13

陳奕迅(Eason)早前做完《中國新歌聲》導師,同周杰倫一向老友鬼鬼,節目未正式播,已經成日喺宣傳片互寸對方,相當搞笑,不過有一集講Eason批評周杰倫唱歌,製作方照播出街,當時Eason話周杰倫唱歌一般,但係作曲好,Eason之後上ViuTV節目再次被追問。

Eason用手指向自己:「你講我吖嘛!嗱!咁講噃!」林二汶問係唔係夾個化學作用,等導師之間有啲火花,卓韻芝插嘴:「唔係噃!真係麻麻哋。」搞到Eason哭笑不得,Eason反駁:「唔係!你要記住,佢回應咗一句,係真,即係我哋講係真,但意思係……佢係唔係話:『你對,你對!』佢意思係你啱,佢好清楚自己係咩,周杰倫佢好有自知之明,我同周杰倫係特別……有一個我唔夠敢郁係劉老師,因為劉老師真係老師,佢知佢玩得,但佢太正經。」陶傑坦言周杰倫由出道已經受批評,基本上唔會介意,Eason就覺得周杰倫啲作品好有創意。

點知Eason吹吹水就跳到……講黎天王黎明!!!Eason試過喺卡拉OK唱黎明啲歌"Sugar in the marmalade",佢話:「我真係唱唔到!」在場啲主持叫佢示範下個感覺,Eason耍手:「我真係試過,唔得!唔work,我唱慢歌ok,快歌唔得。」

Eason見主持起哄,佢都望一望經理人反應,佢笑一笑:「黎生ok嘅,如果我要模仿黎生,我就一路打呵欠,一邊唱就得,因為你打住呵欠唱,我唔示範好似仲亂。」主持再追問咩style係打住呵欠唱,只係寫呢句會出事,Eason惟有示範個tone。

播出呢集後,連日有啲黎明fans睇完條片覺得唔開心,留言「你啲歌又好好聽咩,我又唔多覺,一啲都唔識尊重人」、「你哋班友有冇諗過黎明嘅感受」、「大家同樣在娛樂圈混,都要學吓尊重人」,另有網民覺得「根本就冇好笑到咁誇張,成班主持為咗效果笑到咁」,亦有網民發現主持之一嘅陶傑喺片中係完全冇笑。

咁亦都有黎明fans留言:「我鍾意Leon,但又唔覺得佢寸緊Leon喎!Leon啲歌根本係好難唱到嗰種神韻。」Eason嘅fans就代解釋「根本唔係寸黎明,只係真心以技術角度想講好難演譯黎明啲歌,唱腔好唔同,講笑當認真,咩都鬧一餐。」

3分36秒開始

Messages In This Thread

【打住呵欠唱】陳奕迅扮黎明唱腔 fans嬲嬲:Leon啲歌好難唱到嗰種神韻
Re: 【打住呵欠唱】陳奕迅扮黎明唱腔 fans嬲嬲:Leon啲歌好難唱到嗰種神韻
我唔覺eason唔尊重,反而係班主持問題 *NM*
陳奕迅打住喊露扮黎明 網友話唔尊重