All About Leon

【天王拍劇喇】黎明相隔23年重返電視界 已入組拍40集大陸長劇
In Response To: 2017-06-05 新聞 *NM* ()

http://hk.apple.nextmedia.com/enews/realtime/20170605/56783525

【天王拍劇喇】黎明相隔23年重返電視界 已入組拍40集大陸長劇

建立時間 (HKT): 0605 00:01

被封「金句王」嘅黎明(Leon),近年越嚟越「貼地」,過去仿佛一切都收收埋埋嘅佢,舊年甚至連天王包袱都放下,參與大陸真人騷節目,同其他藝人玩到癲晒。雖然有網民認為佢呢啲舉動係紆尊降貴,但亦有唔少人表示欣賞Leon我行我素,唔理批評做自己認為對嘅嘢。

而Leon帶俾大家嘅驚喜原來仲未完,事關佢啱啱接拍咗一個長40集嘅大陸劇《莫語者》,今次係佢94年拍無綫劇《阿Sir早晨》後,相隔23年拍嘅第一部劇集,就連內地網民都以「王者歸來」嚟形容。

唔少內地網民驚聞Leon參與拍攝都十分驚喜,有人仲將Leon當年拍嘅劇集《天涯歌女》、《回到未嫁時》、《人在邊緣》、《今生無悔》及《原振俠》等劇照遂一貼出,表示好期待佢嘅作品,但亦有網民奇怪今時今日嘅Leon點解會拍劇。

據知,咁多年Leon都無間斷收到四方八面嘅劇集劇本,希望用「天價」吸引佢重投「電視框」,但都俾Leon通通婉拒,除咗因為拍劇花太多時間,最重要係未遇到有興趣嘅劇本,而Leon喺呢套新劇,就會飾演一個前特種部隊成員,拍攝地點除咗喺大陸,仲會遠赴摩洛哥。

據知,黎明日前已經入組,本報嘗試聯絡他,其透過助手回覆:「o依家唔喺香港,無嘢回應喇!」


黎天王會拍攝長達40集嘅大陸劇


《人在邊緣》(資料圖片)


對上一套劇係23年前嘅《阿Sir早晨》(資料圖片)

----------------------------------------------------

http://hk.apple.nextmedia.com/enews/realtime/20170605/56784129

【那些年的黎明】《原振俠》卡士最強 《阿Sir早晨》演教師暫別公仔箱

建立時間 (HKT): 0605 00:02

http://video.appledaily.com.hk/mcp/encode/2017/06/04/3361636/20170604_ent_223_w.mp4

數番手指,黎明喺1986年贏得新秀季軍後,獲大台安排加入劇組,先後參演過處境劇《城巿故事》、《男兒本色》、《回到唐山》等,到1989年,黎明同陳松伶合演《天涯歌女》,該刻以已故著名女歌手周璇作故事藍本,由松松姐姐演周璇,黎明演其夫嚴子華,黎明喺劇中演出備受讚賞,其後劇集陸續有嚟,更喺同年嘅《晉文公傳奇》首次擔正,同劇仲有歐陽震華、羅慧娟同郭秀雲等。

不過數到黎明嘅代表作,應該係以下呢幾套:

《天涯歌女》
1989年,黎明喺《晉文公傳奇》首次擔正,不過,呢套都唔及同年推出、由佢同陳松伶合演嘅《天涯歌女》,《天涯歌女》以已故著名女歌手周璇作故事藍本,由松松姐姐演周璇,黎明演其夫嚴子華,黎明喺劇中演出備受讚賞。

《回到未嫁時》
喺1990年,黎明獲安排同周海媚合演《回到未嫁時》,佢哋更因此劇被傳戲假情真。故事由八妹(周海媚飾)同浩然(黎明飾)結婚兩年後嘅生活開始,點知一次意外,八妹重返4年前,想盡辦法返回現實嘅佢更失憶,佢重走與張浩然拍拖之路,但期間佢發現好多秘密,由於八妹唔想重蹈覆轍,決定逃婚……

《人在邊緣》
呢套好可能係較年輕嘅觀眾對黎明劇集最深印象嘅一套,黎明喺劇中演不良份子,故事有講佢重回正軌,又有少少同表妹(羅慧娟飾)嘅拍拖情節,再有佢點樣面對生父(方剛飾)及姨媽(吳浣儀飾)之間嗰啲家族情仇嘅抉擇,真係好考演技!

《今生無悔》
係1991年推出嘅劇集,亦係黎明同周海媚繼《回到未嫁時》再合作嘅作品,黎明再演反叛不羈嘅角色,又先後同邵美琪及周海媚喺劇中有感情線,之後又要面對家人被害及想報仇但又未報到嗰種折磨……o依家聽好似劇情老土啲,但當年係煞食嘅。

《原振俠》
改編自倪匡經典同名《原振俠》小說嘅時裝科幻劇,呢套劇堪稱超強卡士,包括有李嘉欣、王菲(當年仲叫緊王靖雯)、朱茵同洪欣,4女拱照黎天王,其他合演嘅仲有劉兆銘、吳岱融、魏駿傑、關海山同錢嘉樂等,莫講話部份演員已經去世,剩係要再gather番呢堆人都勁有難度!

《阿Sir早晨》
黎明對上一套喺大台拍嘅就係《阿Sir早晨》,唔做不良份子唔玩chok,做個善良熱血教師,成個題材勁新,有「Mall姐」宣萱做黎明同事、李綺紅做黎明女友,古天樂就做黎明老友,當年班「學生」都大個晒,好似富家女婿吳家樂、轉行賣蛋牛治嘅伍文生、「動L」響朵嘅戴耀明等。


(劇照)


出道冇幾耐嘅黎明有份拍《回到唐山》,後排最右就係佢。(劇照)


拍《天涯歌女》備受賞識(劇照)


被讚演周璇老公嚴子華演得似(劇照)


黎明同周海媚拍《回到未嫁時》傳緋聞(劇照)


《人在邊緣》早排先重播過,應該比較多人識。(劇照)


喺劇中佢同羅慧娟係一對(劇照)


到《今生無悔》再同周海媚合作(劇照)


(《今生無悔》劇照)


《原振俠》卡士超強!有同黎明合作無間嘅李嘉欣。(劇照)


洪欣(被抱嗰個)同朱茵(左)(劇照)


(《原振俠》劇照)


最勁嘅應該係極少拍劇嘅王菲!(劇照)


黎明曾同銘Sir數度合演(劇照)


《阿Sir早晨》係黎明暫別公仔箱之作,有李綺紅(中)同宣萱。(劇照)


其實黎明都有拍過啲電影電影,圖為《霓虹姊妹花續集》。(劇照)


仲有一套叫《勇闖毒龍潭》(劇照)

--------------------------------

http://hk.apple.nextmedia.com/enews/realtime/20170605/56784271

【天王級電影史】《超級學校霸王》三缺一 黎明《甜蜜蜜》擄掠少女心

建立時間 (HKT): 0605 00:02

香港娛樂圈藝人出晒名多才多藝,而早喺80年代已經有歌影多棲發展嘅生態出現,特別係當年一齣《超級學校霸王》,雖然黎明未有參與,但能夠搵黎多位紅星甚至係紅極一時嘅四大天王其中三位演出,可以話係轟動一時,到o依家都時不時被網民拎出嚟「翻叮」回味。

而四大天王除咗歌唱了得,拍電影方面亦令觀眾非常驚喜。劉德華、張學友、黎明、郭富城四位都演技精湛,戲路又夠廣,愛情片懸疑片甚至喜劇都可以見到佢哋嘅蹤跡。

黎明早喺1986年借參加新秀歌唱大賽出道加入大台,最初竟然唔係發展歌唱事業而係被安排去參與電視劇嘅演出,出奇地發掘出演戲天份,開始接觸電影圈,1995年拍攝紀念鄧麗君嘅電影《甜蜜蜜》,溫文儒雅嘅形象成功擄掠全球少女心,雖然金像獎輸咗俾鄭則仕,但係部戲就喺金像獎掃咗9個獎,相當犀利,以為黎明賣靚仔會繼續拍愛情片啦,你又估唔到1996年佢接拍王晶嘅《賭神3之少年賭神》,戲中又要夠型又要扮儍,都幾考演技㗎!不過去到02年嘅時候,黎明仲憑《三更之回家》首次榮膺金馬影帝。

到咗1997年黎明將喜劇同愛情片嘅天份合而為一,同鄭秀文拍攝《愛你愛到殺死你》,劇情輕鬆幽默,而且戲中有多首兩人嘅金曲,當年都十分受年輕人歡迎。經過歲月嘅沉澱,近年黎明喺電影路上開始出演更加深入嘅角色,例如2008年飾演一代京劇大師嘅《梅蘭芳》,揉合故事、歷史與虛構,以虛實交錯的敘述方式,記述一代京劇名人嘅生平。

其實黎明仲有好多精彩角色,例如《十月圍城》中嘅落泊公子乞兒、《火龍》當中嘅火爆警察等,演技越浸越出嘅黎明最近仲接拍咗長40集嘅大陸劇集,令大家都非常期待佢嘅演出。

啱啱講到四大天王獨欠黎明,其實黎明唔係冇同其他天王一齊過拍戲㗎,好似92年喺《明月照尖東》同學友合作過,同年黎明就喺《龍騰四海》客串演殺手,同劉德華同戲演出。


《甜蜜蜜》劇照


《玻璃之城》劇照


《梅蘭芳》劇照


《賭神3之少年賭神》劇照

Messages In This Thread

2017-06-05 新聞 *NM*
黎明相隔23年再拍劇
黎明返大陸搵真銀 事隔23年再拍電視劇 
【係咪好期待?】闊別電視圈23年 「金句王」黎明再拍劇
【天王拍劇喇】黎明相隔23年重返電視界 已入組拍40集大陸長劇