All About Leon

【長情的黎明】夥張智霖陳小春慶七一再返海濱 $150有得睇
In Response To: 2017-05-25 新聞 *NM* ()

https://www.hk01.com/%E5%A8%9B%E6%A8%82/93446/-%E9%95%B7%E6%83%85%E7%9A%84%E9%BB%8E%E6%98%8E-%E5%A4%A5%E5%BC%B5%E6%99%BA%E9%9C%96%E9%99%B3%E5%B0%8F%E6%98%A5%E6%85%B6%E4%B8%83%E4%B8%80%E5%86%8D%E8%BF%94%E6%B5%B7%E6%BF%B1-150%E6%9C%89%E5%BE%97%E7%9D%87

【長情的黎明】夥張智霖陳小春慶七一再返海濱 $150有得睇

撰文: 許育民

黎明又開Show喇,而且今次是繼上年4月8場4D Show,以及今年2月的《Leon's Penguins in Live》後,第3度留守中環海濱,可能見呢個地方咁老黎,就唔好俾佢停。而且今次唔單止一個人老黎,仲將呢份老黎分享俾張智霖同陳小春,齊齊開Show名為《開心幸運里》。

雖然Leon個唱已玩到4D,但他對2D平面的創作仍然不離不棄,昨日曝光的宣傳海報,就見到他再次挑戰平面美學,3個人頭以品字排開形式,砌出如時下最興的手指陀螺圖形。再次引證,Leon,就是任性。


要以3位頭像砌張海報出來,其實方法有很多種,只可話眼前呢種排法是最有創意和膽識。

自從上年,黎明在中環海濱開了一次搞到滿城風雨的演唱會後,Leon的人氣大大急升,進一步升至神枱級位置。見好反應,今年2月已添食,在同一地方,與林建岳合資舉行3場《Dragonland Music Festival》,除有請外國樂隊歌手及DJ坐陣,自己也打頭陣唱第一晚。聞說最終3場演唱會要蝕錢收場,但亦冇減黎生的興致。來到今年七一,Leon會重踏舊地,今次就由中華廠商聯合會邀請黎生在中環海濱開Show,成為慶祝香港特別行政區成立二十周年的認可活動之一,而今次的點子就係找來張智霖同陳小春同場一齊唱。

智霖村 春風街 老黎里 咩嚟呀?

當晚節目名為《開心幸運里》,個名夠老氣吧!《開心幸運里》其實是泛指當日下午5點開始,假中環海濱舉行的所有活動,當中包括「香港舊街」、「香港美食墟」,而3位的演唱環節正名其實係「幸運輪唱團」,大會話想以嘉年華及音樂會形式,讓市民感受過去香港獨有的情懷,用廣東歌去表揚香港文化產業上的成就。

完未?請得郁黎明,大會的創意又豈能點到即止,一於推到盡頭。為營造一股街坊街里的氣氛,大會更為3位歌手設定一個好鬼親民的稱呼,分別係智霖村(張智霖)、春風街(陳小春)同老黎里(黎明),組成「幸運輪唱團」大唱金曲,要與現場觀眾打成一片咁話。忽然覺得,「左麟右李」這個十數年前的創作,原來都幾有型。不過講到最親民,還是票價,入場費劃一$150,比起平時黎生閒閒地索價千幾二幾,真係十分一都唔使,有政府撐,係唔同啲。活動門票將於2017年5月26日(星期五)上午10時正於HotdogTIX 網站(www.hotdogtix.com)內公開發售,似乎要搶。


大會主題玩懷舊,連場地平面圖也如舊式康樂棋設計。


其實成個活動名,令人聯想起TVB一套93年的處境劇《開心華之里》,就連字體都一樣咁歡欣。而當日套劇的主題曲《歡笑末世紀》都係由黎明主唱。(網上圖片)

Messages In This Thread

2017-05-25 新聞 *NM*
視頻:心理建設已完成 黎明依舊"崩潰"
【長情的黎明】夥張智霖陳小春慶七一再返海濱 $150有得睇
廣告經綸:紅人拍廣告一定掂?
黎明孖Chilam小春中環海濱開騷