All About Leon

徐緣讚Nescafe 敢向難度挑戰

https://www.facebook.com/tsuiyuenmarketing/posts/1230294633735179

上年黎明白咖啡廣告轟動一時,見到呢條下集面世,開頭使用同一套路,暗暗替佢地擔心。前作叫好叫座,極度深入民心,新作用原班人馬要突破唔係易事。Nescafe 敢向難度挑戰,我有三份敬意。

兩集相比,我更喜歡下集,原因好簡單,因為我喜歡「自嘲」。自嘲,係智慧與氣度嘅結晶。黎明肯玩番自己走音,仲要精準咁走番當年華東水災籌款表演嗰個走音位,需要一點面對失敗嘅勇氣。

記得早年無綫有個《無綫大寶藏》節目,由 Wyman 同雷頌德訪問 Leon,重提走音一事,黎明笑住憶述細節,話當年籌款表演臨時加唱《對不起,我愛妳》,未能事先綵排,所以起音樂高咗幾個 Key,咁就出咗事。Leon 話唱完入後台,見到班歌手朋友,個個都好辛苦。

辛苦?

黎明話:「忍笑忍得好辛苦。」

坎坷過後有艇搭。走音冇影響今日 Leon 嘅成就,仲成為呢個廣告嘅高潮位之一。

勇敢嘅,唔單係黎明。走音個位,出正品牌名 Nescafe,唔係個個客接受到。

剛打俾 Nescafe 品牌負責人 Kim,讚吓佢嘅勇氣,聽到有關呢個廣告嘅一個小故事。

話說當日林日曦向黎明 Present 呢條下集嘅橋,都未講曬成個 idea,淨係開始提到會改「對不起,我愛你」歌詞,Leon 已經估到:「係咪玩走音呢!」

本來仲諗住問 Kim 點樣遊說到黎明自嘲,原來都唔使遊說。明蝠俠作為金句王,對搞 gag 敏感度高到一個點,並唔係浪得虛名。Leon 話過:「我豁達,所以我唔介意人地話我唔豁達」睇埋呢個廣告,我堅信佢我口講我心。有搞 Gag 嘅智慧,又有自嘲嘅風度,難怪我身邊嘅異性黎粉朋友對佢死心塌地,相信睇到呢個新廣告,又會尖叫兩個鐘頭。

早前出席一個傳媒晚宴,聽到一位資深傳媒前輩,在隔離枱高談闊論白咖啡廣告:「嗰個白咖啡廣告喺好多人 Like 吖,但 Like 有鬼用咩,我就唔信幫到生意,啲後生仔 Like 完唔慌會幫襯啦。」我喺旁邊聽到,笑而不語。

有太多老一輩嘅人,接受唔到時代嘅急速轉變,尤其係 Online 發展對媒體同營銷嘅衝擊,為咗麻醉自己面對巨浪淹至嘅壓力,寧願相信自 High 嘅幻象,冇探求事實與真相。曾問過 Kim,黎明條片推出後,對品牌嘅影響。真相係:不單新產品白咖啡生意急升,連帶整個 Nescafe 所有產品市場佔有率都有所增長,而且效果不是曇花一現,良性影響直至今天。

上年 Nescafe 黎明廣告,對營銷界有重要啟示,喚醒不少同業,正視網絡及社交媒體嘅傳播力。營商打工者有惰性係人之常情,要令 Online Marketing 喺香港加速發展,就需要多一啲成功案例,令業界意識到改變嘅需要同實效。

聽 Kim 講,今次呢個下集廣告,會進一步嘗試做線上媒體與傳統媒體嘅結合。下周一晚會將個 4 分鐘版本放埋喺 TVB 播,仲要喺黃金時段,TVB 嘅廣告收費唔嘢少,致使一直好少有 Long Form 嘅廣告,究竟今次廣告同時出現喺 social media 同 traditional media,會有乜嘢化學作用,值得大家拭目以待。