All About Leon

《我的初心在哪裡》第四章【老黎金句的啟示】

https://www.facebook.com/photo.php?fbid=10153873640876362&set=a.10152224350971362.1073741826.641701361&type=3

《我的初心在哪裡》第四章【老黎金句的啟示】

明蝠俠說話,真心好狠快。
真心,因為他不懂騙人。(例如明人不做暗事暗處有狗咬腳)
好狠,因為他不想騙人。(例如衛蘭肥過部電單車)
快,因為他心急。(例如左手又係肉手掌又係肉)

有一次明蝠俠上保姆車,發現司機峯仔在扒飯盒,峯仔連忙扒埋最尾嗰兩啖準備開車。
明蝠俠:峯仔,你知唔知你既問題係咩?
峯仔(口齒不清):sorrysorrysorry好快好快⋯⋯
明蝠俠:你食得快,但吞得慢!
峯仔(差啲噴飯,但忍住):⋯⋯
明蝠俠:試吓食慢啲,但吞快啲。

又一次,我有聲咳,但又想食支煙,正當點煙之際明蝠俠行過,望住我。
明蝠俠:喱!食煙既人有兩種!
我:⋯⋯
明蝠俠:一種係比支煙控制你個腦!另一種係控制你自己個腦去食支煙!
我:⋯⋯
明蝠俠:你係後者,因為你咳既時候會食薄荷煙!
我:⋯⋯嗯。

有次仲離譜,助手B仔食緊公仔麵,突然明蝠俠衝落樓。
明蝠俠:B仔你望住我!
B仔(個口仲有啖麵):⋯⋯
明蝠俠:你覺得我今日戴con好定係隱形眼鏡好?
B仔(一臉認真扮諗左三秒):con好啲!
明蝠俠:好!(連忙上房戴con)

喜歡他的人說他大智若娛,挖苦他的人說他大愚弱智,其實我覺得他並沒有好像那句金句「我豁達所以我不介意別人說我不豁達」那樣豁達,但最起碼他教懂我什麼叫作 [真]。

明蝠俠的才華,就是他的 [真]。
借用衛蘭的歌詞:這個世界有許多_人,只得你那才華極吸引。

唔知你地信唔信,你肯真心做一件事,你既運氣會好好多!
所以明蝠俠一向好好運,明明遲咗成粒鐘去機場班機都會delay等埋佢,呢啲事成日發生。
因為你真,你先會信
因為你信,你先會做
因為你做,你先會快樂
因為你快樂,你先會行運 ---- 老黎方程式

也許我不明白你為何總是喜歡落手落腳做Production,不計Time Cost。
也許我不明白你為何事無大小都要為創新而創新。
也許我不明白你經管公司的目的和方針。
但我明白你的 [真]!
所以你一生都會咁好運!

在創業路途上每當遇上問題、挫折、落狗屎,我都會想起明蝠俠首經典歌《我會像你一樣傻》,相比起嚟我嗰啲傻算得係咩?但我知只要我夠真,根據老黎方程式,最終都一定會行運!

別人笑我⋯太All In
我笑他人⋯看不穿
食粥食飯⋯天注定
舉頭三尺⋯有黎明

#炒家教育同盟
#我的初心在哪裡
#阿喱

Messages In This Thread

《我的初心在哪裡》第四章【老黎金句的啟示】
Re: 《我的初心在哪裡》第四章【老黎金句的啟示】
Re: 《我的初心在哪裡》第四章【老黎金句的啟示】
Re: 《我的初心在哪裡》第四章【老黎金句的啟示】
Re: 《我的初心在哪裡》第四章【老黎金句的啟示】
Re: 《我的初心在哪裡》第四章【老黎金句的啟示】
Re: 《我的初心在哪裡》第四章【老黎金句的啟示】