All About Leon

真面目 : [b] 盡老婆本 黎明婚前鬚 Good![/b]

上週五晚,黎明以從未曝光嘅鬍鬚 look喺西營盤街市後巷,為林超賢(左)執導嘅警匪片拍宣傳 trailer。林超賢執導嘅《証人》,令張家輝贏得今屆影帝。而林導演早前亦話過:「搵黎明拍新片,希望佢好似《証人》嘅張家輝咁,演技可以去到另一層面。」有機做埋影帝,難怪黎生頂硬上。

Amusic老闆黎明鐵定下月踩入紅館連開 4場演唱會,今次個唱以「 Dream Wedding」為主題,有傳黎老闆將創男歌星先河,在個唱中宣布婚訊,嚇你一跳。
據知 42歲黎明與 29歲樂基兒,將於演唱會後出埠大婚,為搵夠老婆本,可以婚後歎二人世界唔憂做,最近黎準新郎密接戲儲糧。陳可辛監製的大片《十月圍城》仍未埋尾,黎明再接林超賢執導的新警匪片,上週五更率先於上環開工拍片花,本刊直擊黎明全新鬍鬚幹探 look, man爆。

黎明的報喜演唱會《 Dream Wedding Leon Live Summer 09》,將於下月中開鑼,除每朝在上水 St. Andrews Place獨立屋寓所私家池游水減肥練氣外,黎老闆亦趁個唱前空檔,密密拍戲搵定老婆本,早前已接拍陳可辛監製的《十月圍城》,今個月中緊接有新戲開。

該片除咗黎明外,同屬東亞娛樂的師兄劉浩龍(左)亦有份參演,埋位前還與林導演(中)有商有量。

黎明與劉浩龍衫上掛住警察證,估計飾演 CID。正式拍攝時,劉浩龍即收起笑容,緊張地向黎明報告交足戲。

29℃乾蒸
「黎生呢排除咗要籌備演唱會,仲要為《十月圍城》埋尾,加上又接埋林超賢導演執導嗰套新戲,真係忙到癲。」知情人士透露。早於 3月,林超賢為電影《神鎗手》宣傳期間,曾漏口風將於 5至 6月期間,開拍由寰宇投資的警匪片,還鎖定黎明做主角,據知新戲剛開工,連片名都未定,但最近已拍定片花做準備。
上週五( 12日)晚,本刊在上環西營盤街市後巷,直擊黎明拍新戲實況,當晚一臉鬍鬚便衣 look的黎明,孖住劉浩龍在導演指導下做對手戲。為免拍攝期間騷擾到附近居民,拍攝現場一直以黑布密封,雖然當晚氣溫高達 29度似身處蒸籠,但黎天王全無怨言,同以往滋陰錫身兩個樣。為儲老婆本甘做喪 Do男,黎明嫁得過!

黎明個唱名為《 Dream Wedding》,有傳他打算於開騷期間宣布同女友樂基兒結婚。被求證婚訊,早前樂基兒(左)就甜笑回應:「我都唔知係咪真!」

潮鬚男

鬚乞兒 《十月圍城》中,戴上類似黑人 dreadlock假髮兼黐鬚扮乞兒,乞食都要潮。

羊咩鬚 古裝片《狄仁傑》中,劉華黐上二撇雞兼留羊咩鬚,最爆係佢頂帽個造型,落雨唔驚淋濕身。
鬚 Man 唔只《 H3M》大碟封面,最近出席新城演唱會 Eason都以鬍鬚 look示人,但佢啲鬚特別濃密,唔知係咪用咗霸王呢?
採訪、撰文:娛樂組
攝影:娛樂突發組